Gramática popular de la lengua Triqui de Chicahuaxtla

Este artículo es un análisis gramatical de algunos aspectos de la lengua Nanj nïn’ïn y consta de 6 partes. En el primero se abordan algunos aspectos sociolingüísticos; en el segundo se recuperan las iniciativas y propuestas actuales del proceso de escrituralización; en el tercero, cuarto, quinto y sexto se hace un breve análisis gramatical. Con estas 6 partes se pretende evidenciar el camino que podemos seguir para el estudio de nuestra lengua.

Breve gramática de la lengua triqui

Por Fidel Hernandez M.

(Para un una mejor versión de este documento, escríbanos y le enviaremos la versión digital completa en PDF. La actual es sólo una muestra)

Nuguan’ yi’ii – Introducción

Nanj yun’ ni ‘ngo du’wej nga a’ngo da’aj nej nanj man riki yumi guii. ‘Ngo nuguan’an win ni ‘ngo chrej-e niko’. Man ‘ngo sa naduna win sísi wa nej Nanj ni gachrij man doj ‘nga gayi’i nej sí a’mi nanj dan gachrun nej si man, sani chrej na ni sa ga’hue gi’iaj darant  ne’ nga sinuguan’ ne’ win. Man ‘ngo sa da’wi ne’ gi’iaj ne’ win gayi’i ne’ gachrun’ ne’ man, sani unta na ni da’wi ne’ nadigi’ñu sini ne’ daj wa chrej nikaj ñu’u si nuguan’ ne’.

Nuestra lengua es como todas las lenguas del mundo, con ella nos comunicamos y expresamos lo que pensamos y lo que somos. Pero también lo escribimos, no todos pero algunos lo hacemos. Pero puede que un día lo lleguemos a escribir todos.

Esta es la razon del presente trabajo, que es un pequeño análisis gramatical de algunos aspectos de nuestra lengua, el Nanj nïn’ïn y consta de 6 partes. En el primero se abordan algunos aspectos sociolingüísticos; en el segundo se recuperan las iniciativas y propuestas actuales del proceso de escrituralización; en el tercero, cuarto, quinto y sexto se hace un breve análisis gramatical. Con estas 6 partes se pretende evidenciar el camino que podemos seguir para el estudio de nuestra lengua.

Caminemos…

1.- Aspectos generales de la lengua nanj nïn’ïn.

1.1 Nej sí a’mi nanj nïn’ïn.

Nej sí a’mi Nanj nïn’ïn win ‘ngo yi’ni’ nej sí du’wi man rian io’o akuej. Sísi akuej nikin’ ni naj gun’ ne’ ñan atuj gui da ni guchi’ ña man nej sí. Io’o man nej sí ni ninaj ni’ kïj ï huin man, we iuj nan win rian nari’ duwi’ nej kïj gu’naj sierra madre del sur nga sierra madre oriental. Do’oj nej si ni na siganij do’o nej sí mixtecos. Nej yuman’ ta’anj nga nichrun’ nga nej si win nigan, ngaj ni doioj. Nej yuma’ ña’an nikaj nej dugui’ si win Yuma’ niko, San Martín ni Copala.

Nuguan’ a’mi nej si gu’naj NANJ NÏN’ÏN ni ranjsun nej si Triquis unda naga’hui’ nej si ‘ngo si yugui chrej nikaj nej si. Hua da’aj nej duwi’ ni rasuun nej so’ “triques”, “trikis” ni “driki’”. Rian ñaj ahia su nanj ni garasun’ nuguan “nanj nïn’ïn” unda nata’ du’huo’ siyugui ‘ngo sinugun’, ni “triquis” unda nagawi’  ‘ngo si yugui chrej dunaj nej yi’.

Siganinj nej dugui’ ni wa ga’i daj a’mi’. Ne’ man ra kïj nga ni se guña a’mi nga nej dugui’ man San Martín ni nga nej dugui’ man guala. Ni nej so’ man Guala ni se guña a’mi nej so’ nga nej dugui’ man San Martín. O’ ni ga’we gato’ sísi wa wa’ninj yi’ni sinugun’, sa a’mi ne’ man ra kïj’ïj nga, sa a’mi nej dugui’ man San Martin ni sa a’mi nej dugui’ man guala.

Sinugun’ ni sa taj nej sí nadigi’ñu man huin sísi ‘nin siganij nej nuguan ‘nij yi’ni ñuu savii (familia mixteca), ni dakó nej man ‘na’ siganij yi’ni gu’naj otomangue. Hua’ni ni sinugun’ nan ni huani’ nitaj si achrun niko’ man, sani hua ni u’ta a’mi nge man, hue nan huin ‘ngo sása’a.

1.2 Las variaciones lingüísticas

Wa’ninj yi’ni’ sinugun’ wa. ‘ngo yi’ni’ win sa a’mi ne’ man ra kïj nga, a’ngo win sa a’mi nej dugui’ man San Martin ni a’ngo win sa a’mi nej dugui’ man Guala. Siganij nej wa’ninj yi’ni’ nan ni utaj doj unin’, sani si nadigi’ñu we’e nej yi’nin nan ni se si da u’ta chi’ wa nej man.

*
Ne’ man rakij nga nan:                                         Yuwe

*
Nej dugui’ man San Martin:                               Chuve

*
Nej dugui’ man Guala:                                         Chuvee a

Sísi ni’io’ daj naduna nej nuguan’ man yata’ man ni gini’in sísi sé da u’ta niko win naduna man. Ne’ ransun “YU”, nej dugui’ man kïj anej-e  “CHU” ni nej dugui’ man guala ransun we nge “CHU” sani nuta’ nej so’ “A” nga a’mi nej so’. Sísi ni’io’ nej nuguan’ man nika’ nan ni nakaj wento’ doj chej nan.

*
Ne’ man rakij nga nan:                                                Yuku man we’ e

*
Nej dugui’ man San Martin:                                      Chuku man ve’e

*
Nej dugui’ man Guala:                                                 Xcuu man ve’ a

We danaj naduna sinuguan’ nej dugui’ ne’, sísi nari’ nadunaj ni sé si ‘i ta’u ga’mi’ ni gunin’ sa a’mi  a’ngo nej dugui dan. Daj ro’: ne’ man rá kïj nga ni ransun’ “YU” ni nej dugui’ man San Martin ransun “CHU”. Ni rian “YU” ne “WE” ni nej dugui’ dan ransun “VE”. Ni’io’:

Chicahuaxtla

San Martín

Copala

Yutúu

Chutúu

Xtuu a

Ya’aa

Cha’aa

Cha’aa
a

Nawi

Tavi

Nave
a

Awii

Avii

Yavii a

Yawii

Chavii

Chavii
a

Sísi nakaj wendo’ daj naduna nej nuguan’ man yata’ dan ni nadigi’ñu daj a’mi a’ngo nej dugui’i ni gini’in sísi wa ‘ngo chrej niko’ nej man.

13 La variación interna de la variante de Chicahuaxtla

Wa a’ngo yi’ni daj naduna a’mi nej dugui’ ne’ sigani nej ma’an ne’ man ra kïj nga. Ne’ man yuma’ niko ni se guñan a’mi nej nga nej so’ man yuma’ lij. Daj ro’:

*
Yuma’ niko:                       Tanée                   Silij i                     Man da’nen

*
Yuma’ li:                              Dalée                    Lij                           Man da’nan

Na win ‘ngo. A’ngo win sísi sigani nge ‘ngo yuma’ an ni naduna sa a’mi ne’. Sísi ni’io daj a’mi da’ dukuo’ ni nakaj wendo’ daj naduna a’mi ne’.

§ Chirij                   ChirÍ                      Yirij                       Yirí

§ Retóo                  Ratóo

§ Sichij man         Yichij man

We danaj naduna a’mi ne’ siganinj nej ma’an ne’. Sini nitaj si ‘iaj chij nga a’mi’ dadin’ unin’ ni ni’in nujwin si taj a’ngo dugui’.

1.4 Nanée

Sinugun’ ni naduna ‘ngo sa gataj ‘ngo nuguan’an nga naduna daj duniko’ sinane’. Wa da’aj nej dugui’ taj sísi achin rian yuwij nane wa. A’ngo nej si taj si wa u’un, chij, tïn ni ïn. Nuni’in io’ andaj yi’nij win sini we man ‘ngo sa ia win sísi ga’i ta’uj wa.

Ni’io daj naduna nuguan nga naduna nanee:

*
Neé Sa yo’.

*
Nee Sa ranjsun’.

*
Nee Sa go’o’.

*
Ne’ej                    Anin rikï ne’ej

*
Ne’e                     Duguchin ne’e giri’ daj

*
Ngaj                      Siga’an ngaj nij nán.

*
Nga                       Uta man nga yata’a nanj nán.

*
Ngá                       Si ngá ato naj nán.

Nej na win ‘ngo da’nga li daj nanikaj sinugun’. Da’wi uta we’e naniraki’ da’ si gachej ruwo’ nga a’mi’ nga nej dugui’. Sa ruguñu’uj win sísi nga a’mi’ ni sa to’ dan ni nikaj dugui’ij nga a’ngó nej nuguan’an ni we dan ruguñu’uj da’ sigachej ruwo’. Daj ru’wa nej nuguan’ man yata’ dan.

2.- Algo de sintaxis

Sintaxis win ‘ngo nuguan’ nanj stila, sa ‘ia win sísi nadigi’ñuj nej chrej nikaj nej nuguan’ a’mi’, nadigi’ñuj nej sa win frases nga oraciones. Unda siganinj sinugun’ ni nadigi’ñuj awin nej nuguan’ ranj sun’ nga a’mi. Giio’ wenda: “Yá yatoo chrin’in”, nadigi’ñuj awin chrej nikaj nej nuguan’ nan.  Awin yi’ni’ nuguan’ ne sini, awin sa’ ‘na’, awin sa nawij ni unda ni’ñanj go’ngo nej nuguan’ nan.

Sinanij sa win sintaxis ni ga’i yi’ni’ chrej wa, sa gataj ruwa sísi ga’i daj dawi’ nadigi’ñu’ ‘ngo nanj an. Nga nadigi’ñu’ sintaxis ni dawi’ nadigi’ñu’ nej chrej ‘na’ nan:

·
Tipología sintáctica de la lengua

·
Núcleo y modificador

·
La frase: nominal y verbal.

Ne’ ña doj ni ga’mi’ rian yi’i go’ngo nej chrej nan. Ni achrin guchi’ iuj dan ni narisnu’un doj rian yi’i nej sa win frase, verbo nga sustantivo.

Frase:

Siganinj sinugun’ ni frase win ‘ngo nuguan’ nariki ‘ngo sa anir ruwo’ nga unin’ man: Daj ro’:

“Yá yato”

Sísi nadigi’ñu’ nuguan’ nan ni nakaj wendo’ sísi nika wij nuguan’ an. ‘ngo win “yá” ni a’ngo win “yato”. Unda gawin ‘ngo frase ni ruwaj guña wej nuguan’ nan, sísi guyun’ win ‘ngo wej ma’an ni nitaj nu ta. Sísi man “yá” gane ni nuni’in’ awin si yá; sísi man “yato” gane ni nuni’in nuj win si iaj yato dan. Nan ni ´ngo frase ru’u win, w asa ye’e ni chi’ doj: niio’:

“Yá yato chrin’in”

Ñuj nanj ni nata’ nuguan’ “chrin’in”, sa ataj na’an nujwin si yá yato dan. Ga´we ya yu naa nej si koj yugune, sini iuj nan ni chrin’in yá yu. “chrin’in” win ‘ngo objeto directo. Ne’ ña doj narisnu’un rian yi’i nej nuguan’ nan.

Verbo

Verbo win ‘ngo nuguan’ naga’wi’ suun. Ata ‘ngo sa io’. Sísi gachij na’an: nuj win si iaj yato na: chrin’in yá yu. Sa iaj yu win sísi yá yu. O’ ni verbo win ‘ngo sa io’. Niio’:

yato”

ri’i yato”

unanj yato”

atoj yato”

Yato nan ni ga’i sa iaj yu: yá yu, ri’i yu, unanj yu, atoj  yu. Nej sa iaj yu nan gu’naj verbo.

Sustantivo

Yato ni siyugui ‘ngo yuku win. Sandij ni siyugui ‘ngo guii win. Darant nej nuguan’ win ‘ngo siyugui guii, yuku nej si rasuun gu’naj sustantivo. Siganinj nuguan’ “Yá yato chrin’in” yato win sustantivo. Niio’:

“Yá yato”                                            “unanj Juan” “yá guahiu”                                       “unanj yutaj

“Yá nán yi”                                         “unanj aga’a (ache rian io’óo)”

We danaj ‘iaj sun sa win sustantivo. Naga’wij si yugui ‘ngo yuku, guii, rasuun.


Frase

Y á y a t o

Verbo          Sustantivo

2.1 Tipología sintáctica

Sa win tipología sintáctica
nadigi’ñu awin chrej nikaj ‘ngo frase. Unda sinugun’, daj ro’ nio’ asi na doj,
asini verbo win, ‘na’ sustantivo ni ne’ ruku ‘na’ objeto (VSO). Niio’.

Y á                     ya t o                    ch r i n ’ i n

V                           S                             O

G a ’ a n               Va l u                    m a k á

V                            S                             O

U t a                      tá                          ch r u n

V                            S                             O

Sísi niio’ nej nuguan’ nun yata’ man ni nakaj wendo’ sísi darant nej man ayi’i nga verbo, ‘na’ sustantivo ni da rukuu ‘na’ objeto. We danaj iaj sun sinugun’ nga a’mi’ ni we danaj dawi’ gachrun’.

2.2  Núcleo y modificador

Nej nuguan’an ni wa´ngo yi’ij, sa win yi’ij duguno’ nucleo. Sini yi’ij na ni nadunaj sísi naduno’ nuguan’ raj, nuguan’ raj na duguno’ modificador. Siganinj si nugun’ ni nga sini win núcleo ni ne’ ruku na’a modificador. Niio’:

“Y a t o     g a t s i i ”

“Y a t o     y a n a a ”

“Y a t o      y u w a ’ a n j ”

“Yato” win nucleo, yi’ij, ni a’ngo nej nuguan’ taj rian win sa naduna man, modificador, “gatsii”, yanaa” ni yuwa’anj”.

2.3 Frase nominal.

Gaia sini’ nuguan’ ‘na’ nan:

Tá  ‘ninj  kanj.

Nán  nu  yichoj o.

Tá nga nán win si yugui guii; kanj nga yichoj o win si yugui rasuun. Darant nej nuguan’ nan win sustantivo. Unda na ni gu’na frase nominal dadin’ ranj sunj si yugui ´ngo gui, yuku nej si rasuun. Siganinj “Tá ‘ninj kanj” ni wa wij frase nominal: ´ngoj win “TÁ” ni a’ngoj win “kanj”. We dan wa nge siganij “Nán nun yichoj o”: “NÁN” win ‘ngoj no “yivhoj o” win a’ngoj. Unda nuguan’ nanj stila ni nej sa wa danj gu’naj frase nominal simple.

Iaj ni gaio’ nuguan’ nan:

Tá yí  ‘ninj   kanj   nakaa

Iaj ni wej sa win frase nominal ni nadunaj. “Yí” naduna “Tá”; “nakaa” naduna “kanj”. “Yí” nga “kanj” win núcleo, sini guruwi’ si modificador we: “yí” nga “nakaa”. Nej sa wa dananj win frase nominal compleja. Niiaj ñu’:

Frase nominal común

1                                                    2

Tá       yí       nu                 yichoj                 gatsii

Núcleo           Modificador                     Núcleo                   Modificador

2.4 Frase verbal

Nej frase verbal win nej sa nikaj ´ngo verbo. Niio’:

Yutaj unanj

Frase nu yata’ na ni ‘ngo frase vervaj win dadint nika verbo “unanj”. Siganij nej frase na ni se sustantivo naduna, san aduna win nej verbo. Niio’.

Yutaj unanj

José unanj

Ró  unanj.

Nuguan’ “unanj” na win ‘ngo frase verbal, sani ga’we ga chij doj. Niio’:

Yutaj unanj ta’u.

Iaj ni frase nominal win “unanj ta’u”. Sísi nakaj wendo’ sa to’ asij na doj rian yi’i núcleo nga modificador ni yakaj wendo’ sísi “unanj” win núcleo ni “ta’u” win si modificador nucleo dan. Ni’iaj ñu’:

Uta unanj yutaj.

Siganij oración nanj ni “uta unanj” win frase verbal. Duku win núcleo ni “uta” win si modificador. Sa ‘iaj modificador win sísi nadunaj núcleo.

Frase verbal

N u k u a j     yi ’ ñ a n j     y u w e

Modificador           Núcleo

3.- La oración

Frase win ‘ngo yi’ni nuguan’ wa lij. Oración win sa wa yachij doj nga da’ frase. ‘ngo oración ni da’wi ganika ‘ngo sujeto ni ‘ngo predicado. Niio’:

Tá                           uchra’                   chrun.

SUJETO                                  PREDICADO

“Tá” win sujeto, sini we win nge ‘ngoo sustantivo nej. Sujeto na ataj awin si iaj ´ngo suun. Nuj win si ‘iaj tá na: chrun uchra’ si. Sa ‘iaj si na win predicado. Siganinj predicado ni yitinj chre da’wi gi’nij ‘ngo verbo. Ni’iaj ñu

SUJETO                         PREDICADO

Tá uchra’              chrun.

Sustantivo              verbo       objeto directo

Sujeto                                         predicado

Nej        yuchee     atï’ïn                 yá        ‘nin     kuaan

Artículo                                             verbo

‘ngo oración ni ga’we gali ni ga’we ga yachi.  Sa ni’iaj sini ni ‘ngo oración wa li win, man wa’ninj nuguan’an  nika. Sani sa taj “Nej yuchee atïn’ïn yá ‘nin kuaan” ni nikaj ga’i nuguan’an, sani we nge ‘ngo oración win man.

Nej oración ni wa wij yi’ni dugui’ij. Unda nuguan’ nanj stila ni ‘ngoj gu’naj oración simple ni a’ngoj gunaj oración compleja. Nej sa win oración simple nikaj gurin verbo ni sa win oración compleja nikaj wij verbo. Nej sa niio’ a na doj ni oración simple win nej man.

Oración simple

Yikaj nga María ananj yinaan Verbo

Oración compleja

Sandij digi’ñu ne’ gui ni ‘iaj sun sí ne’ niin

Verbo 1                      Verbo 2

Iaj ni nadigi’ñu awin chrej nikaj go’ngo wej yi’ni oración na.

3.1 Oración simple.

Nej oración simple ni wa wij yi’nij: ‘ngoj win oración simple no-negativa ni a´ngoj win oración simple negativa. Niio’ daj win si wa da’ go’ngoj.

3.1.1 Oración simple no negativa.

Gai’i yi’ni’ nej oración nan wa. Unda siganinj sinugun’ ni nuni’in io’ anda wa. Wa’ni ni man rian yi’i u’un’ yi’nij ga’mi’. Nej man win: afirmativa, interrogativa de información, interrogativa confirmativa, imperativa ni exclamativa.

A. Afirmativa

Ne go’ój ruwaj

Chra ya yu

Si ‘iaj sun si

Nigan ga’an

B. Interrogativa de información

Antaj sa’an nara’wi’ ne’

Dane’ gawi’ yu ne’

Nuj win si gu’naj ne’

Nuj win si taj ne’

Daj gininj sí ne’

Awin diu gawin ne’

Nuj win si ‘ia’ ne’

Nuj win si iaj si ne’

Nuj win si iaj Juan ne’

Nuj win si iaj yato ne’

C. Interrogativa confirmativa

Guni’ sa ga’mij a

Gana’ Juan a

D. Imperativa

A’minj so’ a

A wa so’ a

Wa’ nej ra

Gunaj
ta’uu’ ga’anj ra

Ga’mi taj nán an

Nariki si sa’an an

Io gache ra

Digiñu ta’u ra

E. Oracion exclamativa

We dan win nanj an

We dan win sa sa’a naj an

Uta dundaj waj a

Ya’ so’ a’ma

Ni’iaj so’ a ne

Nitaj a’ma

Gire’ej nanj an

3.1.2 Oración simple negativa

Afirmativa negativa

Nu ga’anj yana
dan nigan man

Nuguni sí dan sa gataj man

Nuunin sí dan man

Nuiaj sun sí dan man

Nugo’o yuku dan ne man

Nugawi tane dan man

Interrogativa negativa informativa

Nuni’in antaj sa’an nara’wi’ a’

Nuni’ín awin si gawi’ a’

Nuni’in dane’ ga’an dan yuwe a’

Nuni’in dama numa nán an’.

Nuni’in daj gawin an’.

Nuni’in usaj win ran si a’.

Nuni’iin’ dane’ ne yichij juan an’

Nuni’iin’ daj waj rian sun an’

Interrogativa negativa dubitativa

Yanga ga’an ni’ia si sa’an si ve’ej

Yanga guta’ wej si ve’ej

Interrogativa negativa confirmativa

Se doioj ‘na’ yu un’

Se Juan ganun sun un’

Se rachrun’ win sa taj ma un’

Se maká ga’an yuwej re’ un’

3.2 La oración compleja

Nej oración gu’naj compleja ni iaj sun nga wij verbo ga’anj ne’ ñaa. Ga’we ganika gurin sustantivo sino verbo da’wi gawin ga’ij. Niio’:

·
Aché tá   yí         waj        si.

Verbo 1               verbo 2

Si nadigi’ñu oración “aché tá yí waj si” ni nika wij verbo: “aché” win verbo 1, “waj” win verbo 2. Sani wa oración ga’we ganikaj wa’ninj verbo nej. Niio’:

·
Aché tá    yi         waj       si         sini         nayichu’         nge si.

Vrbo 1                         verbo 2                              verbo 3

We nej na win oración compleja dadint nika ga’i verbo. Nej sí nadigi’ñu rian yi’i nej nuguan’an  ni ga’i yi’ni’ nej oraciones complejas wa taj nej sí, si yugui nej man win: yuxtaposición, coordinación, subordinación ni seriación. Siganij ´ngo nuguan’an ni se si ga darant nej man. Unda sinugun’ ni yi’ni’ wa doj win seriación, sino siganij nanj stila ni nitaj man wa. We nwj na win sa ga’mi ga’an ne’ ña doj. Gayi’i’:

3.2.1 La seriacion u oraciones en serie.

Siganinj sinugun’ ni nej yi’ni’ oración nan win nej sa ranj sun ta’u’ iaj sísi sinugun’ ni ‘ngo nuguan analizante win. Gu’na danaj dadint nej nuguan’ a’mi ni wa ninin darant nej man. Nanj stila ni a’we to’ “conejijto”, “coneja”, “conejote”, sini siganij sinugun’ ni ranj sun’ ga’i nuguan’an: “yato”, “yato li”, “yato yanaa”, “yato xi”. Siganinj nanj stila ni a´we ranj sun’ gurin nuguan’an, man san aduna win daj nawij ne man. Sini siganinj sinugun ni ranj sun’ wij nuguan’an, yiichrá “yato” ni nuto’ “li, yanaa, xi”. Nej yi’ni nuguan’ wa ru’wa sinugun’ na ni uta
nika nej sa win oraciones en serie.

Oraciones en serie win nga siganinj ‘ngo nuguan’an ni a’we nari’duwi’ ga’i verbo, sini nej verbo nan ni niko’ dugui’ nej man. Niio’:

·
Unanj        ga’anj     gataj ra

Corre       ve             dile      (particula de oración indicativa e indicativo de fin de oración)

Verbo   verbo      verbo

Na win ‘ngo oración en serie, nika wa’ninj verbo, niko’ duwi’ che darant nej man. Niio’ doj:

·
Io                     ga’an          gataj          gunin    si      a

Rápido            ve                decir    escuchar      él    (partícula)

(adverbio)  verbo (ir)      verbo          verbo

Siganinj oración nan ni wa wa’ninj verbo, nej wa’ninj man ni nun duwi’ij ni dundaj waj. Sini gawe’ ga ga’i doj verbo siganij nej oración nan: ni’iaj ñu’:

·
“Da      unanj       unanj      ga’anj      gataj     gunin        si    ga’na’    gunin   si    a”

(P)          corre       corre          ve          decir     escuchar  él      venir escuchar  él (P)

Verbo       verbo     verbo       verbo     verbo                  verbo  verbo

Iaj ni se wa’ninj verbo win, da chij man win. Ga’we gato’ si wa ga’i oración simple, a’ngo da’a ga’we gawin yuxtapuestas nej si sobordinadas, sini se dan win. Oración na ni ‘ngo oración en serie  win man, ga’i verbo ranj sun’ da ni ga’we gato’ ‘ngo sa win ruwo’.  Sa ‘na’ nan ni ye’e doj waj.

·
“Da unanj unanj  ga’anj gataj  gunin       si ga’na’  gunin       si sa taj     tá          yí        a”

(P)  corre   corre      ve      decir  escuchar él   venir   escuchar él    habla     padre grande  (p)

Verbo  verbo verbo   verbo  verbo                verbo    verbo                              verbo

Iaj ni tïn verbo win. Nej nuguan’ wa dananj gunaj seriación siganinj chrej nikaj sinugun. Gachin’ nga a’ngo yi’ni’ verbo.


La variante
de Copala tiene su propio alfabeto y escritura desarrollado más por los
lingüistas del Instituto Lingüístico de Verano, por tanto, defieren las grafías
que se usan con las de la variante de Chicahuaxtla. En este escrito, para
respetar la escritura de Copala, se utilizará palabras extraídas del “Pequeño
diccionario ilustrado en el triqui de Copala” del ILV.

Responder

Introduce tus datos o haz clic en un icono para iniciar sesión:

Logo de WordPress.com

Estás comentando usando tu cuenta de WordPress.com. Cerrar sesión / Cambiar )

Imagen de Twitter

Estás comentando usando tu cuenta de Twitter. Cerrar sesión / Cambiar )

Foto de Facebook

Estás comentando usando tu cuenta de Facebook. Cerrar sesión / Cambiar )

Google+ photo

Estás comentando usando tu cuenta de Google+. Cerrar sesión / Cambiar )

Conectando a %s